Rutas das aves Cabo Touriñán – Moreira

Percorrido pola beira continental da “IBA Mariña Costa da Morte”, de importancia mundial para o paso migratorio de diferentes especies de aves mariñas. O cabo Touriñán, eríxese a modo de miradoiro excepcional para observar esta espectacular trasfega, ao que cabe sumar a riqueza de hábitats presentes na contorna máis próxima. Abruptos acantilados e extensas zonas de matos atlánticos, contrastan cunha variada paisaxe en mosaico nos arredores das aldeas, o que asegura unha elevada diversidade de especies. A maiores, danse todos os elementos para a sedimentación de aves con remotas procedencias, convertendo esta zona nun reclamo para os procuradores de rarezas.